ఫాదర్స్ డే రోజు కరణ్ జోహార్ ఎమోషనల్ పోస్ట్

బాలీవుడ్ లో ప్రముఖ నిర్మాత కరణ్ జోహార్ ఫాదర్స్ డే సందర్భంగా పిల్లలతో తన అనుబంధాన్ని గుర్తుచేసుకుంటూ సోషల్ మీడియాలో ఓ భావోద్వేగ పోస్ట్ పెట్టారు. సరోగసీ ద్వారా తండ్రిని కావాలన్న నిర్ణయం తన జీవితంలోనే అత్యంత సంతృప్తికర నిర్ణయమని పేర్కొన్నారు. సింగిల్ పేరెంట్‌ ఎన్నో సవాళ్లు ఎదుర్కోవాల్సి వస్తుందని ఆయన వివరించారు. 2017లో సరోగసీ ద్వారా యశ్, రూహీ అనే కవలలకు కరణ్ జోహార్ తండ్రయ్యారు. ఈ నిర్ణయం తన జీవితాన్ని పూర్తిగా మార్చేసిందని ఆయన తెలిపారు.

"కొన్ని నిర్ణయాలు హఠాత్తుగా తీసుకుంటాం, కొన్ని వ్యూహాత్మకంగా ఉంటాయి, మరికొన్ని దైవానుగ్రహంతో జరుగుతాయి. సింగిల్ పేరెంట్‌గా మారాలన్న నా నిర్ణయం, నేను తీసుకున్నవాటిలో అత్యంత భావోద్వేగభరితమైన సంతృప్తినిచ్చిన నిర్ణయం. నా ప్రతి ప్రార్థనకు విశ్వం ఇచ్చిన సమాధానం నా పిల్లలు" అని కరణ్ తన ఇన్‌స్టాగ్రామ్ పోస్టులో రాశారు.

తల్లిదండ్రుల పెంపకం గురించి ఎన్నో పుస్తకాలు చదవమని, పాడ్‌కాస్ట్‌లు వినమని, ఇతర తల్లిదండ్రులతో మాట్లాడమని చాలామంది సలహాలిచ్చారని, అయితే ప్రతి ఒక్కరి పేరెంటింగ్ ప్రయాణం, ముఖ్యంగా సింగిల్ పేరెంట్ ప్రయాణం చాలా ప్రత్యేకమైనదని కరణ్ అభిప్రాయపడ్డారు. తాను కూడా కొన్నిసార్లు తడబడతానని, పొరపాట్లు చేస్తానని ఒప్పుకుంటూనే, తన పిల్లల అమితమైన ప్రేమ ప్రతీసారి తనను నిలబెడుతుందని ఆయన వివరించారు.

యశ్, రూహీ తన జీవితానికి కొత్త అర్థాన్ని, పరిపూర్ణతను ఇచ్చారని 53 ఏళ్ల కరణ్ జోహార్ తెలిపారు. "నా పిల్లలు నాలోని లోటును భర్తీ చేశారు. నా హృదయంలో ప్రేమకు మరింత స్థానం కల్పించారు. నా ఉనికిని పరిపూర్ణం చేసిన నా దైవప్రసాదాలు రూహీ, యశ్‌లకు ఫాదర్స్ డే శుభాకాంక్షలు" అంటూ తన పిల్లల ఫోటోను కూడా పంచుకున్నారు. ఈ పోస్ట్ ప్రస్తుతం సోషల్ మీడియాలో వైరల్‌గా మారింది.